KOB Subyektləri və Klubları Assosiasiyası (KOBSKA) Bakıda keçirilən “İnternational Agro Business Forum– 2023” tədbirində göstərdiyi media dəstəyinə görə APA Groupa mükafat təqdim edib.

Assosiasiyanın sədri Nigar Ələsgərova çıxışında bu günkü görüşün hər iki tərəf üçün məhsuldar olduğunu, hər iki qurumun öz güc və imkanlarını birləşdirərək yerli bazar iştirakçılarının inkişafı üçün daha da yaxşı imkanlar yarada biləcəyini qeyd edib.

APA Group-un rəhbəri Vüsalə Mahirqızı isə KOBSKA-nın forumun təşkilatçılığında görünən və görünməyən əziyyətinin olduğunu açıqlayıb.

“Bu kimi tədbirlərdə həm tədbir təşkilatçıları, həm də tədbirə dəstək olanlar bir-birilərini daha yaxından tanımağa imkan tapırlar. Biz tədbirin media dəstəkçisi olsaq da, KOBSKA-nın digər tərəfdaşlarla necə koordinasiyalı şəkildə işlədiyinin şahidi olurduq. Assosiasiyanın daxili komandası həm bizə, həm də tədbirə qatılanlara anında dəstək göstərərək məsələləri operativ həll edirdilər ki, bu da tədbirin qüsursuz keçməsinə imkan verirdi. Mən çox şadam ki, APA Group tədbirin media tərəfdaşı olmaqla yanaşı, həm də ölkədə keçirilən bu mötəbər tədbirin, orada səsləndirilən fikirlərin dünyaya çatdırılmasında birbaşa çıxış edirdi. Bu kimi yanaşmalar onu göstərir ki, KOBSKA keçirilən istənilən tədbirlərdə sahibkarlığa dəstək göstərmək qabiliyyətindədir.”

Sonda isə Vüsalə Mahirqızı mükafata görə Nigar Ələsgərovaya təşəkkürünü bildirib.