“İş dünyası 100 ilin zirvəsi - İzmir”

18-19 aprel tarixlərində Türkiyənin İzmir şəhərində Azərbaycanlı və Türkiyəli iş adamları arasında “İş dünyası 100 ilin zirvəsi 3” biznes forum-sərgisi keçirilib.

Ulu öndər Heydər Əliyevin 100 illik yubileyinə və Türkiyə Respublikasının 100 illiyinə həsr olunan layihə Kiçik və Orta Biznesin İnkişafı Agentliyi və İzmir Ticarət Odasının rəsmi tərəfdaşlığı, Kiçik və Orta Biznes Subyektləri və Klublarının Assosiasiyasının (KOBSKA) təşkilatçılığı ilə həyata keçirilib.

Tədbirin rəsmi açılış mərasimində İzmir Ticaret Odası idarə heyətinin üzvü Mahmut Erkoç, Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov, İzmir Ticaret Ofisi Təmsilçisinin baş müşaviri Cavid Abdullayev və KOBSKA-nın İdarə Heyətinin sədri Nigar Ələsgərova çıxış ediblər.

Qeyd edək ki, "İş Dünyası 100 ilin Zirvəsi" biznes forum-sərgisi bundan öncə 13-14 iyul 2023-cü il tarixlərində İstanbul, 21-22 noyabr 2023-cü il tarixlərində isə Ankara şəhərlərində həyata keçirilib.