7 mart, 2023 tarixində Azərbaycanda “Qadın Gündəliyi” – Milli Dialoq Platformasının ictimaiyyətə təqdim olunması ilə bağlı konfrans keçirilib.

Dövlət qurumları, diplomatik korpus, qadın və gender təşkilatları, hökumət rəsmiləri, beynəlxalq tərəfdaşlar, digər maraqlı tərəflərin iştirakı ilə keçirilən tədbirdə gender bərabərliyi və qadınların səlahiyyətləndirilməsi, qadın liderliyi və qadınların siyasi, iqtisadi, sosial, mədəni məsələlərdə qərarların qəbul edilməsi proseslərində təmsilçiliyi müzakirə edilib.

“Qadın Gündəliyi” – Milli Dialoq Platformasının ictimaiyyətə təqdim olunmasında məqsəd 2023- cü ildə qadın hüquqlarını və bərabərliyini müdafiə edərək, Beynəlxalq Qadınlar Gününü qeyd etmək, çoxtərəfli dialoqu və bu siyasi prioritet məsələləri üzrə əməkdaşlığı asanlaşdıran “ Qadın Gündəliyi” Platformasının Milli Dialoq Prosesinə başlamaq, qadın vətəndaş cəmiyyəti təşkilatlarını, hökumət rəsmilərini, siyasətçiləri, maraqlı tərəfləri birgə fəaliyyətə çağırırış etmək üçün bir araya toplamaqdır.

Təqdimat zamanı FemACT Azərbaycan Qadın Fondunun təsisçisi Pərvanə Məmmədova , Ailə, Qadın və Uşaq Problemləri üzrə Dövlət Komitəsinin sədri Bahar Muradova, Əmək və Əhalinin Sosial Müdafiəsi naziri Sahil Babayev, Elm və Təhsil nazirinin müavini İdris İsayev, Daxili İşlər Nazirliyinin mətbuat xidmətinin kütləvi informasiya vasitələri ilə iş və ictimaiyyətlə əlaqələr şöbəsinin müdiri Elşad Hacıyev çıxış ediblər.

Daha sonra çıxış edən BMT-nin Azərbaycandakı rezident əlaqələndiricisi Vladanka Andreyeva, Böyük Britaniyanın ölkəmizdəki səfiri Fergus Auld, Avropa İttifaqının Azərbaycandakı səfiri Piter Mixalko, Niderlandın Azərbaycandakı səfiri Pauline Eizame, İsveçin Azərbaycandakı səfiri Tobias Lorentson çıxış edib. Tədbir “Azərbaycanda Qadın Gündəliyinin əsas prioritetləri və tövsiyələri” mövzusu üzrə panel müzakirələrlə davam edib.

KOB Subyektləri və Klublarının Assosiasiyasının sədri Nigar Ələsgərova 2- ci paneldə “Qadın Gündəliyi” nin əsas prioritetləri və tövsiyələri mövzusunda çıxış edib.